المقالات
නිර්මාණශීලී මාධ්‍යවේදියෙකුගේ අත්වැල සතත්‍යාභාසයයි.
- කතු වැකිය
- الزيارات: 1973
මාධ්‍ය වෘත්තිය ලොව සතරවන ආණ්ඩුව ලෙස හැඳින්වේ. විධායකය, අධිකරණය හා ව්‍යාවස්ථාදායකය යන ආණ්ඩු තුනට පසු සිව්වන ස්ථානයට පැමිණෙන ජනමාධ්‍ය වෘත්තිය නිර්මාණශීලී ගවේෂණාත්මක මුහුණුවරකින් හැඩගැන්වෙන වන විට එහි ඇති සමාජීය අගය තව දුරටත් වැඩි වේ. කැමරාවක් අතට ගත් විගස හෝඅ පෑනක් අතට ගත් විගස මාධ්‍යවේදියෙකු නිර්මාණය නොවේ. කෙතරම් තාක්ෂණික උපකරණ තිබුණත් එවා හසුරවන මිනිසාගේ පිටුපස ඇති චින්තනය හා මනස මාධ්‍යවේදි භූමිකාව ගැන මනා අවබෝධයකින් සන්නද්ධ වීම අනිවාර්ය වේ. වර්තමාන සමාජයේ මාධ්‍ය වෘත්තිය සඳහා විවිධ සමාජ තලවල පුද්ගලයින් ස්ත්‍රී පුරුෂ භේදයකින් තොරව සමන්ධවන අයුරු අපට දැක ගත හැකිය. සමාජ මාධ්‍ය භාවිතය හා සන්නිවේදන තාක්ෂනය වේගයෙන් සමාජගත වීම මේ සඳහා හේතුවක් වේ. පුරවැසි මාධ්‍යයන් ද ලොව වේගයෙන් ව්‍යාප්ති වන නිසා මාධ්‍ය වෘත්තිය සඳහා කවර පුද්ගලයෙකු ප්‍රවිශ්ට වූවද එහි දිගු සාර්ථක ගමනක් යාමට නම් මාධ්‍ය වෘත්තියට අදාළව නිරන්තර සතත්‍යාභ්‍යාසයේ යෙදිය යුතුයි.
සතත්‍යාභ්‍යාසය යනු නිතර නිතර පුහුණුවීම් කිරීමයි. මාධ්‍ය වෘත්තියට පමණක් නොව ලොව සෑම නිර්මාණයක්ම, වෘත්තියක්ම නිවැරදිව කිරීමට නිරන්තර පුහුණුව අවශ්‍යයි. ඉංජිනේරු වෘත්තියද, වෛද්‍ය වෘත්තියද, නීතීඥ වෘත්තියද, රියදුරු වෘත්තියද යනාදී නේක විද වෘත්තීන්ට එම වෘත්තියට අදාළ කාර්යයන් හි නිතර නිතර නිරත වී මනා පුහුණුව ලබා ගත යුතුයි. මාර්ටින් වික්‍රමසින්හයන් මෙරට මහා ගත්කරු බවට පත් වූයේ එක රැයකින් නොවේ. විවිධ කෙටි කතා, නවකතා ලියමින් සතත්‍යාභ්‍යාසය ප්‍රගුණ කිරීමෙනි. වෝල්ටර් ක්‍රොන්කයිට්, ක්‍රිස්ටියන් අමන්පූර්, බොබ් වුඩ්වර්ඩ්, හන්ටර් එස්.තොම්සන් හා එඩ්වර් ආර් මුරෝ යනු ලොව විශිෂ්ට යැයි සම්මානයට පාත්‍ර වූ මාධ්‍යවේදීන්ය. මොවුන් ලොව ගෞරවාදරයට පාත්‍ර වූයේ තම වෘත්තිය පිළිබඳ ඇති කරගත්තා වූ අඛණ්ඩ පුහුණුව නිසාවෙනි. මෙලෙස දක්ෂ ලේඛකයෙකු, කැමරාශිල්පියෙකු, විඩියෝගැෆිශිල්පියෙකු, විශේෂාංග රචකයෙකු, ප්‍රවෘත්ති සංස්කාරකවරයෙකු නිර්මාණය කිරීමට නම් මෙකී නිරන්තර පුහුණුව අත්‍යවශ්‍ය වේ. මෙකි පුහුණුව ලබා ගැනීමට, පාසල්, විශ්වවිද්‍යාල හා ජාතික මට්ටමින් ක්‍රියාත්මක වන විවිධ වැඩසටහන් ද තිබේ. කුමන අවස්ථා හා ආයතන තිබුණත් විද්‍යාර්ථීන් ඊට සම්බන්ධ වී ඒ සම්බන්ධයෙන් තම දැනුම වර්ධනය කරගැනීම කළ යුතුයි.
එලෙස නිර්මාණශිලී මාධ්‍යවේදියෙකු නිර්මාණය කිරීමට කැලණිය විශ්වවිද්‍යාලයේ සන්නිවේදන හා මාධ්‍ය ඒකකය විසින් පවත්වාගෙන යන නේමඬල නම් මෙම වෙබ් පුවත්පතේ "Young Journalist" විද්‍යාර්ථී කණ්ඩායමද තම හැකියාවන්, කුසලතාවයන් වැඩි දියුණු කිරීමට නම් නිතර පුහුණුවීම අවශ්‍ය වේ. එවිට මෙම කණ්ඩායම හරහා විශ්වවිද්‍යාලය බලාපොරොත්තු වන ආකාරයේ දක්ෂ මාධ්‍යවේදීන් හා රටට අවශ්‍ය සැබෑ පුරවැසියනුත් නිර්මාණය කිරීමට හැකි වේ. මෙම යහපත් අරමුණ පෙරදැරිව සතියක් පුරා සන්නිවේදන හා මාධ්‍ය ඒකකය විසින් පවත්වන්නට යෙදුණු පුහුණු වැඩසටහන් මාලව තුළ කැලණිය විශ්වවිද්‍යාලයීය විද්‍යාර්ථීන්ගේ නිර්මාණශීලීත්වය හා සතත්‍යාභ්‍යාසයත් වර්ධනය කරගැනීමට අවශ්‍ය විවිධ නිදසුන් හා උපක්‍රම ඉදිරිපත් වුණි. එම මාර්ගෝපදේශයන් නිසි ලෙස පුරුදු පුහුණු කර සතතභ්‍යාසය තුළින් "Young Journalist" විද්‍යාර්ථී ඔබගේ කුසලතා, ලේඛන ශක්‍යතාවත්, මාධ්‍යවේදී කුසලතාවත් වැඩි දියුණු වනු නොඅනුමානයි.
සංස්කාරක
