තිරුක්කුරල්
- ගවේෂණ
- الزيارات: 2109
තිරුක්කුරල් ජීවනාදර්ශ වූත් , උසස් සාහිත්‍යාංඟවලින් පරිපූර්ණ වූත් දෙමළ සාහිත්‍ය නිර්මාණයකි.දෙමළ භාෂාව ඒ ඒ කාල වකවානුවල දක්නට තිබූ භාෂාත්මක ලක්ෂණ සහ පාලකයන් ප්‍රමුඛ කර ගනිමින් යුග 06 කට බෙදා දක්වා තිබේ. ඒවා පහත පරිදි වර්ග කර දැක්විය හැක.
- සංඟකාලම් - ක්‍රි.පූ.3
- සංඟමරුවිය කාලම් - ක්‍රි.ව.3 සිට ක්‍රි.ව.6 දක්වා
- පල්ලවර් කාලම් - ක්‍රි.ව.6 සිට ක්‍රි.ව.9 දක්වා
- චෝලර් කාලම් - ක්‍රි.ව.9 සිට ක්‍රි.ව.14 දක්වා
- නායක්කර් කාලම් - ක්‍රි.ව.14 සිට ක්‍රි.ව.17 දක්වා
- ඓරෝප්පියර් කාලම් - ක්‍රි.ව.17 සිට ක්‍රි.ව.20 දක්වා
- තට්කාලම් - ක්‍රි.ව.20 සිට අද දක්වා
මෙම ‘තිරුක්කුරල්’ නැමති සාහිත්‍යාංගය නිර්මාණය වී ඇත්තේ දෙමළ ප්‍රාකෘත යුගය හෙවත් සංඟකාලම් තුළ යි.මෙම යුගයේ බිහි වූ නිර්මාණ අතුරින් වඩාත් විශිෂ්ට වූ නිර්මාණයක් ලෙස ‘ තිරුක්කුරල් ’ දැක්විය හැක ය.මෙය ආගම (அறம்) , ආර්ථිකය (பொருள்) , ලෞකික ජීවිතය (காமம்) යනාදී ප්‍රධාන කොටස් ත්‍රිත්වයකින් සමන්විත වේ. මෙම කෘතිය තුළින් මිනිසා හා සම්බන්ධ සෑම පැතිකඩක් පිළිබඳව ම අවධානය යොමු ව තිබේ. උදාහරණ ලෙස පුද්ගලයාගේ ගෘහ ජීවිතය, සමාජය හා මිනිසා අතර පවත්නා බැඳීම, අන්‍යයන් හා සහයෝගීව ජීවත් විය යුතු ආකාරය යනාදී අංශ රැසක් පිළිබඳ අවධානය යොමු ව තිබේ. තව ද මෙය හින්දු ආගමික පාසල්වල භාවිත වන සහ උගන්වන ප්‍රධාන මූල ග්‍රන්ථය ද වේ.
මෙම ග්‍රන්ථය තිරුවල්ලුවර්තුමා විසින් රචනා කරන ලදී. නමුත් රචනා වූ කාලය නිශ්චිතව සඳහන් නොවේ.මෙය සංඟකාලම් හි අවසාන සාහිත්‍ය නිර්මාණය ද වන අතර භාෂාත්මක වර්ගීකරණයන් ක්‍රි.ව.450 සිට 500 දක්වා වන කාලයට පසුව ද සිදු වූ බව කියැවේ.
මෙම තිරුක්කුරල් ග්‍රන්ථය වායුරෙයි වාල්ත්තු, උත්තර වේදම්, දෙයිව නූල් යනාදී විවිධ නම්වලින් හැඳින්වේ. අවිහිංසාවාදය ප්‍රධාන කොටගත් මෙම ග්‍රන්ථය මිනිසා සතු විය යුතු ආචාර ධර්ම, ඇවතුම් - පැවතුම් ආදිය ඉතාමත් සිත් සිත්ගන්නා සුළු අන්දමින් පාඨකයා සමීපයට ගෙන එනුයේ ද්වී පෙළකිනි.මේ සමඟම භාෂණය, කාරුණික බව, ආදරය, ඉවසීම, ස්වයං පාලනය, ස්තූතිවන්ත වීම, යුතුකම්, වගකීම් යනාදී අංග රැසක් පිළිබඳ සාකච්ඡා කර ඇත. එපමණක් නොව දේශපාලනය, අධ්‍යාපනය, කෘෂිකර්මය වැනි ශ්‍රේෂ්ඨ සහ මිත්‍රත්වය, ආදරය, විවාහ ජීවිතය යනාදිය පිළිබඳව ද මෙහි අඩංගු වේ. ආරම්භය පටන් අවසානය දක්වා ම විවිධ ආදර්ශ පාඨ, සමාජ, දේශපාලනික, ආර්ථික, ආගමික සහ ගෘහ යනාදී සෑම අංශයක් පිළිබඳව ම අවධානය යොමු කිරීම සුවිශේෂ වේ .එපමණක් නොව ඒවා අතීතයට පමණක් නොව වර්තමානයට ද ප්‍රායෝගිකව වැදගත් වීම තුළින් මෙකී ග්‍රන්ථයේ සුවිශේෂත්වය වඩා වැඩි වේ.
තිරුවල්ලුවර්තුමාගේ මෙම නිර්මාණය නිර්මාණය ඉහළින් අගය කළ සහ එතුළින් ජීවිතය සකසා ගත් පුද්ගලයන් අතර ඉලංගෝවඩිගල්තුමා, කම්බර්තුමා, ලියෝ ටෝල්ස්ටෝයි, මහත්මා ගාන්ධි, ඇල්බට් ස්වෛට්සර්, රාමලිංග ගුරුතුමා ,ව.උ.සිදම්බරපිල්ලෙයි, ජී.යූ.බෝප් යනාදී පුද්ගලයන් වැදගත් වේ.
දෙමළ සාහිත්‍ය තුළ පවතින නිර්මාණ අතර අධික ලෙස වෙනත් භාෂාවන්ට පරිවර්තනය වූ සහ භාවිතයට ගැනුණු කෘතියක් ලෙස තිරුක්කුරල් කෘතිය දැක්විය හැක. ඉන්දියාවේ පමණක් නොව වෙනත් රටවල ද භාෂා 40 කට ආසන්න ප්‍රමාණයකට මෙම ග්‍රන්ථය පරිවර්තනය සඳහා බඳුන් වී ඇත.
එපමණක් නොව තිරුක්කුරල් ග්‍රන්ථය තුළ කුරල් නොහොත් උපදෙස් 1330ක් අඩංගු ව ඇති අතර වාග්මාලා 14000ක් අඩංගුය. ඉන්දියානු භාෂා අතර ගුජරාටි, හින්දි, බෙංගාලි, කණ්ණඩ, කොන්කනි, මලෙයාලම්, මරාති, මනිපුරි, ඔරියා, පංජාබි, රාජස්ථානි, සංස්කෘත ,තෙළිඟු ආදී භාෂා 14කින් ද වෙනත් භාෂාවන් වන අරාබි ,බුරුම, චීන, ෆිජියන්, ඉන්දුනීසිය භාෂා, ජපන් ,කොරියන් ,මලායි, සිංහල, උර්දු ආදී භාෂා මෙන්ම යුරෝපීය භාෂා වන ඩච්, ඉංග්‍රීසි ,ප්‍රංශ ,ජර්මන්, හංගේරියා, ඉතාලි, ලතින් ,නෝර්වේ, රුසියා, ස්වීඩන් ආදී රටවල භාෂාවලට ද පරිවර්තනය වී තිබේ.
භගවත් ගීතාවලිය හින්දූන් විශ්වාස කරනුයේ දෙවියන් විසින් මිනිසා හට ජීවිතය පිළිබඳ කියා දුන් උපදේශාත්මක ග්‍රන්ථයක් ලෙස යි. තිරුවාසගම් යනු දෙවියන් වහන්සේට මිනිසා රචනා කළ ග්‍රන්ථය යි. නමුත් මිනිසා විසින් මිනිසා හට ලබාදුන් උපදේශාත්මක කාව්‍ය නම් තිරුක්කුරල් බව දමිළ භාෂකයන් මෙන්ම දමිල භාෂකයන් මෙන් ම හින්දු භක්තිකයන් ද විශ්වාස කරති.
තිරුක්කුරල් යන්න මානව අයිතිවාසිකම් පිළිබඳ හෙළි කරන්නා වූ එක්තරා ග්‍රන්ථයකි. මානව අයිතිවාසිකම් රටක පවත්නා සංස්කෘතිය, පරිසරය, සංවර්ධනය ආදියෙහි බලපෑම මත මූලික අයිතිවාසිකම් බවට පත් වී තිබේ. මෙය රටකින් රට වෙනස් විය හැක. එක්සත් ජාතීන්ගේ සංවිධානය විසින් ලොව සියලු දෙනා පිළිගත යුතු මානව අයිතිවාසිකම් පිළිබඳ කරුණු හෙළි දක්වා ඇත. ඒ 1948 දී ය. නමුත් සෑම රටක් ම මෙය එක සේ නො පිළිගත් බව සැවොම දත් සත්‍යකි.
මානව අයිතිවාසිකම් යනු මිනිසාගේ මූලික අවශ්‍යතාත් නිදහසත් මතු කර පෙන්වන ආර්ථික තත්වය, රට, සීමා, වයස, හැකියා ,ජාතිය, ස්ත්‍රී පුරුෂ භාවය යනාදියට එහා ගොස් එක් එක් මිනිසාගේ ජීවත්වීමේ නිදහස (Right to live),නිදහස ( freedom) ,සමානාත්මතාව ( equality) ,සාධාරණය (justice) ,සිතීමේ නිදහස (freedom thoughts), ලිවීමේ සහ කතා කිරීමේ හැකියාව ( freedom of expression ) යනාදිය ද මූලික අයිතිවාසිකම් බව තිරුවල්ලුවර් තුමා තිරුක්කුරල් කෘතිය තුළින් ප්‍රකාශ කළේය.
එතුමාගේ විචාරාක්ෂියට අනුව මානව අයිතිවාසිකම් ප්‍රධාන කොටස් දෙකකි.
- සිවිල් සහ දේශපාලන නිදහස. - ( Civil and Political rights)
- සමාජ ආර්ථික සහ සංස්කෘතික නිදහස - ( Economic , Social and Cultural rights)
01.සිවිල් සහ දේශපාලනික නිදහස
- ජීවත් වීමේ නිදහස - Right to Live
- ජාතිකත්වයට ඇති අයිතිය - Right to Nationality
iii. නීතිය ඉදිරියේ සමානාත්මතාව - Equality in front of Law
- සිතීමේ නිදහස - Right to Think
- ලිවීමේ සහ කතා කිරීමේ නිදහස - Right to spoke and write
- රැකවරණ උරුමය - Heritage of care
02.සමාජ ආර්ථික සහ සංස්කෘතික නිදහස
- ආහාර ලබා ගැනීමට ඇති නිදහස - Right to Food
- අධ්‍යාපන නිදහස - Right to Education
iii සංස්කෘතික කටයුතු සඳහා සහභාගි වීමේ නිදහස - Right of participation in cultural activities
- පෞද්ගලික දේපල සඳහා ඇති අයිතිය - Right to personal property
ඉතා ඈත අතීතයේ නොදියුණු සමාජයක් පැවති අවධියක වුවද මෙවන් විශිෂ්ට කෘතියක් නිර්මාණය වීම සහ එය වර්තමානයට පමණක් නොව අනාගතයට ද ප්‍රයෝජනවත් වීම මෙකී කෘතියේ අගය තව තවත් වැඩි කරයි.
නිර්මලා බාලක්‍රිෂ්ණන්
විශේෂවේදී තෙවන වසර
වාග්විද්‍යාව අධ්‍යයන අංශය
මානවශාස්ත්‍ර පීඨය
