සබරගමුවේ උසම කඳු මුදුන ගොන්ගල කන්ද
- ගවේෂණ
- الزيارات: 1208
අද අප කතා කරනු ලබන ගොන්ගල කදු මුදුන දකුණු ලක පුංචි නුවරඑළිය ලෙසින් විරුදාවලිය ලද්දකි. ශ්‍රී ලංකාවේ උසින් පහලොස්වන පහළොස්වන කඳු මුදුන ලෙසින් මෙය නම් කර ඇති අතර එහි උස අඩි හාරදාස් හාරසිය පනස් පහක් පමණ (අඩි 4455) ලෙස සඳහන් වෙයි. මෙම කඳු මුදුන පිහිටි සබරගමුව කඳුකර කලාපය බුළුතොට රක්වාන කඳු ලෙස ද හැදින්වෙයි. මෙම කඳු පන්තිය පිහිටා ඇත්තේ මාතර දිස්ත්‍රික් මායිමේ පිහිටි දෙනියාය නගරයට ආසන්නයේ ය. එබැවින් මෙම කඳු මුදුන දෙනියාය රක්වාන මාර්ගයේ ගමන් කිරීමේ දී දැකගත හැකි වේ. එමෙන් ම ගිං ගඟ පෝෂණය කරන්නා වූ ප්‍රධාන ගංගා දෙකක් මෙම කඳුකර කලාපයෙන් ආරම්භ වීම ද මෙහි එන තවත් එක් සුවිශේෂීත්වයකි.
ගොන්ගල යන නාමය මෙම කඳු පන්තියට හිමිව ඇත්තේ මෙහි කඳු මුදුන ගොනෙකුගේ හිසාකාර ගල්පර්වතයක් මෙන් පිහිටීමත් එකල මෙම ප්‍රදේශය ගොනුන්ගේ රාජධානියක් වීම නිසා ත් බව විශ්වාස කෙරේ.
මෙහි නියම ගමනාන්තයට ළඟාවන මාර්ගය නාමික හමුදාවේ ප්‍රධාන නාවික සන්නිවේදන පද්ධතිය හා අනෙකුත් මාධ්‍ය ආයතන වල විකාශන කුළුණු ස්ථාපිත කර ඇති අධි ආරක්ෂිත කලාපයේ ය එබැවින් ගොන්ගල දක්වා ගමන් කිරීමට නම් එහි නාවික හමුදා කදවුර දැනුවත් කර ඔවුන්ගේ අවසරය ලබා ගැනීම අනිවාර්යය වේ. මෙහි උසම ස්ථානයේ ගල්තලාව වෙත ප්‍රවිශ්ට වූ විට දකුණු පළාතේ හා සබරගමු පළාතේ විශාල ප්‍රදෙශයක් මෙහි සිට නිරීක්ෂණය කල හැකි වීමත් මෙහි එන සුවිශේෂීත්වයකි. කඳු මුදුන වෙත යන ගමනේදී කුඩා ජල පහරවල් හමුවන නිසා ඒවායෙහි ජලය සපයා ගැනීම ද කළ හැකි වීමත් මෙහි අත්හරින ලද එනසාල් වගාවක් ද දැකිය හැකි වීමත් ඉතාම සෞම්‍ය ගුණයෙන් යුතු පරිසර වටපිටාවකින් සමන්විත වීමත් මෙහි එන කාගේත් නෙත් සිත් සනහාලන්නේය.
සීත මීදුම් වළාකුළුවලින් බරිත මෙම කඳුකර ප්‍රදේශය දේශීය සංචාරකයින්ගේ වැඩි ඇස ගැටීමක් නොමැති නිසා තවමත් මෙහි ස්වභාවිකත්වය ආරක්ෂා වෙමින් පවතී. නමුත් බොහෝ දේශීය සංචාරකයින් මේ වන විට ගොන්ගල කන්ද තරණය කිරීමත් දක්නට ලැබෙනුයේ ම එහි පවතින සුන්දරත්වය නිසා ම බවත් කිව යුතුමය. කන්දේ එක පසෙකින් නොව නොපෙනෙන මානය තෙක් විසිරී ගිය සිංහරාජ අඩවියත් අනෙක් පසින් මධ්‍යම කඳුකරයේ කඳු පන්ති හා තවත් පසෙකින් වියළි කලාපයේ විශාල ප්‍රදේශ දිස්වීමත් නිසා මෙම කඳු මුදුනේ ඇති සුන්දරත්වය අපරිමාණ වන්නේ ඒ නිසාමය.
නොසන්සිඳෙන කඳු තරණය කරන්නන් වෙනුවෙන් ගොන්ගල කන්ද තරණය කිරිම කඳු තරණය කරන්නන්ගේ සා පිපාසාව නිවා ගැනීමට නම් ගෝග්‍ය වන්නේමය.
එස්.ඒ.තිලක්ෂි උත්පලා
විශේෂවේදී දෙවන වසර
ජනසන්නිවේදන අධ්‍යයනාංශය
කැලණිය විශ්වවිද්‍යාලය
